Елімізде қанша әскери қызметші вакцина салдырды
НҰР-СҰЛТАН. ҚазАқпарат – Бүгінгі таңда әскери қызметшілер арасында вакцина салдырғандардың жалпы саны 30 мыңға жуықтады. Бұл туралы Орталық коммуникациялар қызметінде өткен брифингіде айтылды, деп хабарлайды ҚазАқпарат тілшісі.
«Әскери қызметшіні толық әскери-медициналық қамту үшін барлық жағдай жасалған. Қарулы Күштерде осы үшін қажетті медициналық құралмен жабдықталған 15 госпиталь, лазарет, емхана, 130-дан астам медициналық пункт, рота мен бөлімше жұмыс істейді. Одан басқа, санитариялық-эпидемиологиялық қызметтер, дәрі-дәрмекпен, медициналық бұйыммен қамту үшін қоймалар жұмыс істейді», - дейді «Қарулы күштерде заттай мүлікпен қамтамасыз ету және тамақтандыруды ұйымдастыру» туралы брифингіде ҚР Қорғаныс министрінің орынбасары Мұхамеджан Таласов.
Ол пандемия кезеңінде Нұр-Сұлтан және Алматы қалаларындағы госпитальдерде инфекциялық стационарлар жұмыс істейтінін айтты.
«Өңірлік госпитальдер мен лазареттерде осындай қызметтер үшін қосымша инфекциялық бөлімшелер ашылған. Төрт ПТР-зертхана жұмыс істейді, олардың әрқайсысы тәулігіне 300-ге дейін талдама жүргізе алады. Қарулы күштердегі әскери-медицина қызметкерлерінің қажырлы еңбегінің және індеттің таралуының ең белсенді кезеңінде барлық санитарлық-эпидемиологиялық талаптардың сақталуының арқасында әскерде коронавирус инфекциясын жұқтырудың жаппай жағдайлары тіркелген жоқ. Бүгінгі таңда екпе алғандардың жалпы саны 30 мыңға жуық. Екпе салу әлі де жалғасуда», - дейді ол.
