Елімізде кәсіпорындардың іскерлік белсенділік индексі төмендеді
АСТАНА. ҚазАқпарат – Қазақстанда өнім шығарудың заттай түрі азайған. Бұл туралы ҚазАқпарат Ұлттық статистика бюросына сілтеме жасап хабарлайды.
Өткен тоқсанмен салыстырғанда 2022 жылдың III тоқсанында өнім шығарудың заттай түрі азайды. Есепті кезеңде дайын өнімге сұраныс шамалы өсті. Осылайша сұраныстың өзгеруін бағалау балансы 3%-ды, өндіріс өзгеруін бағалау балансы 2%-ды құрады (2022 жылдың II тоқсанында тиісінше 2% және 5%).
2022 жылдың III тоқсанында жүргізілген сауалнамалық зерттеу нәтижелері бойынша алынған өнеркәсіптік кәсіпорындардың іскерлік белсенділігін сипаттайтын кәсіпкерлік сенімділік индексі төмендеп, 5%-ды құрады. Бұл ретте өнеркәсіптік кәсіпорындардың 69%-ы қазіргі сәтпен салыстырғанда қаржы-шаруашылық қызметтің өзгермейтіндігін, 13%-ы жақсаруды және 9% -ы нашарлауды күтеді.
Сонымен қатар алдыңғы тоқсанмен салыстырғанда тұтынушылық сұраныс өзгеріссіз қалды. 2022 жылғы III тоқсандағы сұраныстың өзгеруін бағалау балансы екінші тоқсанмен салыстырғанда -4% (2022 жылғы II тоқсанда -4%) құрады, тауар айналымы көлемін бағалау балансы 1%-дан 0%-ға дейін төмендеді.
Сауда кәсіпорындарының іскерлік белсенділігін сипаттайтын кәсіпкерлік сенімділік индексі -2%-ды құрады. Мұндай айтарлықтай төмендеуге сұраныс пен экономикалық жағдайдың тұрақсыздығы әсер етті.
Сауда кәсіпорындарының жартысынан көбі – 61% ағымдағы сәтпен салыстырғанда қаржы-шаруашылық қызметтің өзгермейтіндігін күтеді, 14% жақсарады және 11% нашарлайды деп болжануда.
Құрылыс кәсіпорындарының басшылары 2022 жылдың III тоқсанында 2022 жылдың II тоқсанымен салыстырғанда экономикалық жағдайдың нашарлағанын атап өтті. Мәселен, тапсырыстар портфелінің бағаларын өзгерту балансы алдыңғы тоқсанмен салыстырғанда азайып, 2%-ды құрады. Орындалатын жұмыстардың нақты көлемінің өзгеруін бағалау балансы 7%-дан 2%-ға дейін төмендеді.
Алынған құрылыс кәсіпорындарының іскерлік белсенділігінің өзгеруін сипаттайтын кәсіпкерліктің сенімділік индексі өзгергерді және (-4%)-ды құрады.
Құрылыс кәсіпорындарының 67%-ы қаржылық-шаруашылық белсенділіктің ағымдағы кезеңмен салыстырғанда өзгеріссіз қалатынын, 9%-ы жақсаратынын және 11%-ы нашарлауын күтеді.
