Елімізде сауданың 0,45 пайызы ғана интернет арқылы жасалады

АЛМАТЫ. 14 қараша. ҚазАқпарат - Қазақстандық банк карточкаларын қолданушылар 2015-2016 жылдары электрондық төлемдерге 3 млрд. доллар қаржы жұмсауы мүмкін. Бұл туралы бүгін Алматыда жаңадан құрылған Интернет бизнес пен мобильді коммерцияның қазақстандық қауымдастығының баспасөз мәслихатында айтылды.

«Түрлі бағалаулар бойынша 2012 жылы еліміздегі электрондық төлемдер нарығының көлемі 300-400 млн. долларды құрады. Соңғы 2 жылда ол жылына 70-80 пайызға дейін өсті. «МастерКард» мәліметіне қарағанда, былтыр қазақстандық банк карточкаларын қолданушылар электрондық төлемдер арқылы шетелге 1,4 млрд. доллар аударған», - дейді Processing.kz-тің тең қожайындарының бірі Константин Горожанкин. Оның айтуынша, Қазақстанның электрондық төлемдер нарығы 2015-2016 жылдары 3 млрд. долларды құрауы мүмкін. 3 жыл бұрын жасалған бұл есептеулер оны растап отыр. Қазір еліміздегі 1200 интернет дүкеннің 500-інде ғана кем дегенде аптасына 1 рет транзакция жасалады. Қалғандарында ондай көрсеткіш жоқ. Жалпы қазір республикадағы сауданың 0,45 пайызы ғана интернет арқылы жүзеге асырылған. Ал бұл Ресейде 4 пайызды құрауда.