Елімізде жыл соңына дейін төрт жеңіл өнеркәсіп нысаны ашылмақ
АСТАНА. ҚазАқпарат - Алдағы жеңіл өнеркәсіп қызметкерлері күніне арналған салтанатты шара барысында ҚР ИЖТМ Өнеркәсіп комитетінің төрағасы Бақтыбай Қасымбеков жыл соңына дейін елімізде 4 жеңіл өнеркәсіп нысаны ашылатынын жеткізді.
«ҮИИД мемлекеттік бағдарламасы жүзеге асырылғалы бері жеңіл өнеркәсіп саласында 15 кәсіпкерлік ашылып, биылғы жылдың соңына дейін оған тағы 4-еуі қосылмақ», - дейді Б.Қасымбеков.
Комитет төрағасының айтуынша, жеңіл өнеркәсіпте 1,5 мыңнан астам кәсіпкерлік жұмыс істейді. Соның 97%-ы - шағын және орта кәсіпкерлік. Ондағы саны 12 мыңнан асып жығылатын жұмыскерлердің басым бөлігін әйел адамдар құрайды, деп хабарлайды strategy2050.kz.
«Қазақстанның жеңіл өнеркәсібі шығаратын өнімінің 51%-ы текстильді бұйымдар болса, 42%-ы киімдерге, ал 7%-ы былғары мен оған қатысты өнімдерге тиесілі», - дейді өнеркәсіп саласының басшысы.
Қазақстан Республикасының текстильді саласының шикізаттық базасы мақта мен жүн екені анық. Б.Қасымбековтың айтуынша, 2008-2013 жылдар аралығында жеңіл өнеркәсіпте қосылған құны жоғары өнімдер экспорты құндық мәнде 2,4 есеге, яғни 39,3 млн. АҚШ долларынан 95 млн. АҚШ долларына дейін өсті.
