Еліміздегі бос жұмыс орындарының басым бөлігі Астана қаласында болып тұр

АСТАНА. 29 сәуір. ҚазАқпарат - 2013 жылғы 1 қаңтардағы жағдай бойынша еліміздегі бос жұмыс орындарының басым көпшілігі Астана қаласында қалыптасқан. Бұл 5 044 бірлікті құрайды. Бұдан кейінгі орындарда Алматы қаласы (4 964 бірлік) және Шығыс Қазақстан облысындағы (3 039 бірлік) ірі және орта кәсіпорындарында қалыптасып отыр. Бұл туралы ҚР Статистика агенттігінің «Ірі және орта кәсіпорындардағы кадрларға қажеттілігі және саны туралы» есебінде көрсетілген.

Агенттік мәліметтеріне қарағанда Астана қаласында бос жұмыс орындарының басым көпшілігі денсаулық сақтау және әлеуметтік қызметтер саласында (1 733 бірлік) болса, Алматы қаласында көтерме және бөлшек сауда мен автомобиль жөндеу саласында (1 147 бірлік), ал Шығыс Қазақстан облысында өнеркәсіпте (1 431 бірлік) қалыптасқан.

«Қызметкерлерге қажеттіліктің басым көпшілігі Қарағанды облысында белгіленді және бұл аталған облыста - 4 697 адамды, Алматы қаласында - 4 576 адамды, Астана қаласында - 4 403 адамды, Қостанай облысында - 4 138 адамды құрады», - делінген агенттік хабарламасында.

Сонымен қатар, бос орындардың ең аз көрсеткіші Жамбыл облысында - 148 бірлік, Қызылорда облысында - 216 бірлік, Ақтөбе облысында - 303 бірлікті құраған. Ал қызметкерлерге ең аз қажеттілік Қызылорда (276 адам), Ақмола (291 адам) және Ақтөбе облыстарында (479 адам) қалыптасты.