Еліміздің халықаралық резерві 1 жылда 1,1 млрд долларға ұлғайды
АСТАНА. ҚазАқпарат – Еліміздің халықаралық резерві 1 жылда 1,1 млрд долларға ұлғайды. Бұл туралы бүгін Үкімет отырысында Ұлттық банк төрағасы Ғалымжан Пірматов айтты, деп хабарлайды ҚазАқпарат тілшісі.
«2022 жылы жалпы халықаралық резервтер 90,8 млрд долларға дейін 1,1 млрд долларға ұлғайды. Алтын-валюта резервтері еркін конвертацияланатын валютадағы активтердің ұлғаюына байланысты былтыр 35,1 млрд долларға дейін 696 млн долларға өсті. Алдын-ала деректер бойынша, Ұлттық қордың активтері өткен жылы 55,7 млрд долларға дейін 403 млн долларға артты», - деді Ұлттық банк төрағасы.
Оның атап өтуінше, республикалық бюджетке 4,6 трлн теңгеге трансферттер бөлу үшін жыл басынан бастап 4,3 млрд долларға валюталық активтер сатылды.
«Дамыған елдердегі орталық банктердің ақша-кредит саясатын күшейту риторикасына байланысты облигациялар мен акциялар нарығы жыл басынан бері едәуір төмендеді. Алайда, қор құрылған сәттен бастап оның ұзақ мерзімді кірістілігі жылдық мәнде 3,02 пайыз болды», - деді Ғалымжан Пірматов.
