Эльмира Сыздықова Азия чемпионатының қола жүлдегері атанды
АСТАНА. KAZINFORM - Бішкекте күрес түрлерінен өтіп жатқан Азия чемпионатында бүгін әйелдер құрамасының үздігі Эльмира Сыздықова қола жүлдені қанағат тұтты.
76 келі салмақта сынға түсіп жүрген отандасымыз Сыздықова осымен төртінші мәрте Азия чемпионатының қола жүлдегері атанып отыр. Ол 2014, 2021 және 2023 жылы да Сарықұрлық біріншілігінде тура осылай үздік үшінші орыннан көрінген еді.
Сыздықова қола медаль үшін күресте үндістандық Прияны жеңді. Ол аталған доданың жартылай финалында қырғызстандық Айпері Медетқызынан ұтылып қалды.
Бүгін сондай-ақ тағы бір балуан қызымыз Зулфия Яхьярова үшінші орын үшін күресте қарсыласына жол берді.
Естеріңізге сала кетейік, осыған дейін Қырғызстанда күрес түрлерінен өтіп жатқан Азия чемпионында еркін күрес шеберлері 1 алтын, 2 күміс, 1 қола медальмен жалпы есепте 4-орнға ие болғанын жазған болатынбыз.
