Еліміз оң бағытта дамып келеді – сауалнама

АСТАНА. KAZINFORM – Қоғамдық саясат институтының зерттеу нәтижесі бойынша респонденттердің 70%-дан астамы еліміз дұрыс бағытта дамып келеді деп есептейді. 

Аталған пікірмен ауыл тұрғындарының 80,7%, 24 жасқа дейінгі жастардың 78,9% және әйелдердің 72,2% келісіп отыр. Халықтың қазіргі саяси және әлеуметтік-экономикалық жағдайды бағалауында біршама оң қалып байқалады, яғни 76,5% және 67%.

Аталған нәтиже елімізде жүргізіліп жатқан реформалардың оң қабылдануымен байланыстырылады. Қоғамдық-саяси салада азаматтар ауыл әкімдерін тікелей сайлау мүмкіндігіне ие болды, сайлау жүйесі айқындала түсті, сол сияқты Конституциялық сот қайта құрылды, гендерлік теңдік бастамалары әйелдерге саясат пен қоғамдық өмірге белсенді қатысуға жаңа мүмкіндіктер ашты.

Әлеуметтік-экономикалық саладағы өзгерістер бюджет саласы қызметкерлерінің табысын айтарлықтай арттыруға, ауқымды қолдау бағдарламасын іске қосуға, жер ресурстарына әділ қолжетімділікті қамтамасыз етуге, қауіпті және зиянды өндірістерде еңбек ететін жұмысшылар үшін зейнетке шығу жасын төмендетуге мүмкіндік берді.

Жалпы, сауалнама нәтижесі бойынша респонденттердің 89% көңіл-күйін оң сипаттаған. Оң көзқарас көбіне 18-35 жас аралығындағы жастар, бойдақтар мен отбасылы азаматтар және жоғары білімді респонденттерге тән.

Қазақстан түбегейлі өзгерістер мен терең реформалар жолына түсті: Парламент құзыреті кеңейді, азаматтар әкімдерді сайлай алатын болды. Еліміздің қоғамдық-саяси және басқа да салаларында тағы қандай өзгерістер болып жатыр - Kazinform тілшісі талдау жасаған еді.