Елімізде гид мамандарын даярлауы мүмкін

АСТАНА. KAZINFORM – Бүгінде кәсіби гидтерге арнайы бейдж беріледі, ол маманның біліктілігінің көрсеткіші. Бұл бағыттағы жұмыс туралы толығырақ Туризм және спорт министрі Ербол Мырзабосынов айтып берді.

- Біз қолға алған келесі бастама цифрландыру арқылы гидтердің қызметін реттеу. Қолданыстағы реестр туристерге қажетті гид табуға, оған хабарласып, кәсіби біліктілігін тексеру мүмкіндігін бермейді. Сондықтан министрлік тапсырысы бойынша гидтерге арналған бірыңғай цифрлық платформа жасалған. E-Гайдс цифрлық жүйесі аталған мәселелерді шешіп қана қоймай, мамандардың білімін тексеруге, біліктілігін арттыруға және қосымша білім беруге мүмкіндік береді, - деді Ербол Мырзабосынов Үкімет отырысында.

Оның айтуынша, тексерістен өткен гидтерге бірыңғай стандарттағы бейдж беріледі, ол бейдж білікті маманның белгісі.

- Қазір жүйеде 380 гид тіркелген. Оның 94-не бейдж табысталды. Осы тәжірибені кең тарату үшін жергілікті атқарушы органдары, Ғылым және жоғарғы білім, Оқу-ағарту министрліктері тарапынан гид мамандарын даярлайтын бағдарлама әзірлеуге атсалысуды сұраймыз, - дейді ол.

Бұған дейін Туризм және спорт министрі елімізге келіп алданып қалатын шетелдік туристер мәселесін шешу жолдарын атады. 

Айта кетейік, елімізде туристерге арналған, жасанды интеллектіге негізделген TravelStan мобильді қосымша әзірленеді.