Елімізде пәтер және мүлік иелері кооперативіне жауапкершілік күшейеді

АСТАНА. KAZINFORM – Сонымен қатар жаңа заң жобасында тұрғын үйлерді басқару субъектілеріне салық салу тәртібі де айқындалмақ. 

Мәжілістің қарауына «Қазақстан Республикасының кейбір заңнамалық актілеріне тұрғын үй-коммуналдық шаруашылық мәселелері бойынша өзгерістер мен толықтырулар енгізу туралы» Қазақстан Республикасы Заңының жобасы енгізілді.

«Аталған заң жобасы Қазақстан Республикасы Парламенті депутаттарының бастамасымен әзірленді. Заң жобасының мақсаты – тұрғын үй қорын басқару жөніндегі қызметті жетілдіру, басқару процестерін цифрландыру. Пәтер иелері кооперативтері мен мүлік иелері бірлестіктеріне арналған бірыңғай талаптарды белгілеу. Сонымен қатар тұрғын үй инспекцияларының функцияларын кеңейту», - деді Экономикалық реформа және өңірлік даму комитетінің хатшысы Екатерина Смышляева Мәжілістің жалпы отырысында.

Оның айтуынша, заң жобасында тұрғын үйлерді басқару субъектілеріне салық салу тәртібі айқындалады.

«Сондай-ақ, үйлерді басқару жүйесіне қатысушыларға әкімшілік жауапкершілік күшейтіледі. Заң жобасын жұмысқа алуға және олар бойынша қорытынды әзірлеуге дайынбыз», - дейді ол.