Елімізде жүз адамға донорлық жүрек қойылды – министр

АСТАНА. KAZINFORM – Алғаш елімізде жүрек трансплантациясы 2012 жылы 38 жастағы пациентке жасалды. Бүгінде жүз адамның жүрегі ауыстырылды.

- Бүгін Қазақстан медицинасы үшін ең маңызды күн. Тәуелсіздік алғалы медицина саласының ең биік шыңы трансплантация деңгейі деп айтуға болады. Сондықтан елімізде жүзінші трансплантациясы жасалғаны шын мәнінде тарихи сәт. Бүгін іс-шараның мақсаты – еліміздің медицина саласындағы осы жетістігін айту, бұл жолда бірнеше жыл бойы медицина саласының мамандары еңбек етті. Ең алғаш елімізде жүрек трансплантациясы 2012 жылы 38 жастағы пациентке жасалды. Жаңа жүрек адамдарға жаңа өмір берді, бұл отандық медицинаның жеткен жетістігі. Адами капиталдың дамуына, оның ішінде медицина саласы Президенттің жіті назарында, - деді Денсаулық сақтау министрі Ақмарал Әлназарова елордада «Жүректің жаңа соғысы» деген ұранмен өткен «Қазақстандағы 100-ші жүрек трансплантациясы» форумында. 

Министрдің мәлімдеуінше, соңғы жылдары медицина саласына бөлінетін қаржы көлемі бірнеше есе артты. 

- Елімізде жасалып жатқан оталарды Орталық Азия және ТМД елдері арасында жетекші орында деп айтуға болады, - дейді ведомство басшысы. 

Айта кетсек, бүгін елордада «Қазақстандағы 100-ші жүрек трансплантациясы» форумы өтті. Аталған іс-шара елімізде жүзінші рет жүрек ауыстыру отасына орай ұйымдастырылды, оған Денсаулық сақтау министрі Ақмарал Әлназарова бастаған сала мамандары мен өңірлік ведомстволардың өкілдері қатысты. 

Форум соңында ағза трансплантациясы саласына еңбегі сіңген және ерекше көзге түскен жандар марапатталды. 

Аталған іс-шарада елімізге белгілі дәрігер Юрий Пя трансплантация тек медицина мәселесі емес, қоғамның ортақ проблемасы екенін мәлім етті.

Еске сала кетейік, былтыр елімізде трансплантация жасалатын орган арнайы құрылғыда сақталатыны туралы жазған едік. 
Қазір аталған аппарат сынақтан өтіп жатыр, биыл сәуірден кейін пайдалануға берілуі мүмкін.