Елорда іргесіндегі елді мекендерді дамытуға қомақты қаржы бөлінеді
НҰР-СҰЛТАН. ҚазАқпарат - Елорда іргесіндегі елді мекендерді дамытуға қомақты қаржы бөлінеді. Бұл туралы бүгін Нұр-Сұлтан қалалық стратегиялық және бюджеттік жоспарлау басқармасы басшысының міндетін атқарушы Айжан Түгелбаева айтты, деп хабарлайды ҚазАқпарат тілшісі.
«Қала төңірегіндегі әлеуметтік және инженерлік инфрақұрылымдарды дамыту бағдарламасы бойынша қосымша 4 млн теңге бөлінеді», - деді ол Нұр-Сұлтан қаласы әкімдігі жанындағы қоғамдық кеңес отырысында.
Басқарма мәліметтеріне сәйкес, аталған қаражат Көктал-2, Ильинка, Өндіріс, Железнодорожный тұрғын үй алаптарында 4 спорттық-сауықтыру кешенін салуға жұмсалады.
«Қала төңірегін дамыту аясында бізде тізілім бекітілген және осы тізілім биылдан бастап республикалық бюджеттен қаржыландырылатын болады. Төңіректегі барлық инфрақұрылым жақсара түседі», - деді Айжан Түгелбаева.
Сонымен қатар «Денсаулық сақтау нысандарын салу және жаңғырту» бағдарламасына қосымша 4 млн теңге бөлінеді. Бұл сома №1 қалалық аурухана аумағында 250 төсек-орынға арналған перзентхана орталығын, Жеңіс даңғылы бойынша 500 төсек-орынға арналған қалалық көпбейінді аурухананы жобалауға қарастырылып отыр.
