Елорда полицейлері қала көшесінде бір азаматты атып өлтіргендерді құрықтады
Бұл туралы агенттік тілшісіне Астана қалалық ІІД мемлекеттік тіл және ақпарат бөлімінің бастығы Нұрділдә Ораз мәлім етті.
Оның айтуынша, қыркүйектің 3-інде түнгі сағат 1-ден 45 минут өткен кезде Абай мен Республика даңғылдарының қиылысында «Опель» мен «Субару Форестер» көлігіндегі бейтаныс азаматтар арасында кикілжің туындайды. Оқиға барысында травматикалық қарудан 4-5 рет оқ атқан адамдар дереу ізін жасырып, «Субару Форестер» көлігінің жүргізушісі алған жарақаттан сол жерде көз жұмады.
«Бұл оқиға бойынша ҚР Қылмыстық кодексінің 96-шы бабы бойынша қылмыстық іс қозғалды. Қазіргі уақытта осы қылмысқа қатысы бар 2 адам қолға түсіп, тергеу амалдары басталды. Сонымен қатар оқиғаға қатысы бар басқа азаматтар да анықталып, қазір оларды тұтқындау шаралары жүргізілуде», деді Н.Ораз.