Елорда полицейлері көпірден секірген жүкті әйелді құтқарып қалды

НҰР-СҰЛТАН. ҚазАқпарат – Елордалық полицейлер өзенге секірген жүкті әйелді құтқарды. Бұл туралы «ҚазАқпарат» халықаралық ақпарат агенттігі Polisia.kz сайтына сілтеме жасап хабарлайды.

Астаналық полицей Алмаз Құлтанов Қабанбай батыр даңғылында қызмет бабымен жүріп, сағат 12:20 шамасында «Рамстор» сауда үйі маңындағы Есіл өзенінің көпірінде бейтаныс қыздың әдеттен тыс әрекеттерін байқап қалады. Кенет қыз сыртқы киімдерін шешіп, суға секіруге әрекеттенеді. Ол дереу жедел басқару орталығының кезекшісіне хабарлап, өзі көпірге қарай беттейді. Ол кезде әйел де суға секіріп үлгерген еді. Құлтанов та оның артынан суға секіреді.

«Тәртіп сақшысы әйелге дейін жүзіп барып, киімінен ұстап, жағаға қарай бет алды. Осы кезде серіктестері Асылхан Нұрмұхамбетов құтқару шеңберін лақытырып, Нұрсұлтан Сариев те серігіне көмектесу үшін суға секірді», - деп жазады Polisia.kz.