Елорда тұрғыны Ақмола облысында болған жол апатынан көз жұмды
КӨКШЕТАУ. ҚазАқпарат – Ақмола облысында тасжолда адам өліміне әкеліп соққан жол апаты болды. Екі автокөліктің соқтығысуы салдарынан елорда тұрғыны қаза тапты, төрт жолаушы Нұр-Сұлтан қаласының ауруханасына жеткізілді. Оның арасында үш бала бар, деп хабарлайды ҚазАқпарат.
Ақмола облысы полиция департаменті баспасөз қызметінің хабарлауынша, 24 шілде күні сағат 11:35-те Целиноград ауданының полиция бөлімшесінің кезекші бөліміне «Екатеринбург-Алматы» автожолының 1241-шақырымында Ы.Алтынсарин ауылының маңында жол апаты болғаны жайлы хабар келіп түскен.
«38 жастағы «Lada priora» маркалы автокөліктің жүргізушісі Нұр-Сұлтан қаласының тұрғыны Талапкер ауылы бағытымен келе жатып, рөлді басқара алмай, алдында келе жатқан рөлді 39 жастағы Талапкер ауылының тұрғыны тізгіндеген «Lexus» маркалы көлікпен соқтығысқан. Жол-көлік оқиғасының салдарынан «Lada Priora» маркалы автокөліктің жүргізушісі алған жарақатынан оқиға орнында көз жұмды», - деп атап өтті ведомство.
Аталған факті ҚР ҚК 345-бабының 3-бөлігі бойынша тіркелді.
«Lada Priora» автокөлігінің түрлі жарақат алған жолаушылары - 31 жастағы елорда тұрғыны мен кәмелетке толмаған 8, 12, 17 жасар үш бала Нұр-Сұлтан қаласының ауруханасына жеткізілді.
Тағы үш бала дәрігерлердің тексерісінен кейін үйіне жіберілді.
Полицейлер атап өткендей, аталған іс бойынша тергеу амалдары жалғасуда, сараптама тағайындалды.
