Елордада 17-18 желтоқсандағы оқиғаларға қатысқандарға 20 мың теңгеден әлеуметтік көмек көрсетіледі
АСТАНА. 4 желтоқсан. ҚазАқпарат - Астанада Тәуелсіздік күніне орай 1986 жылғы 17-18 желтоқсандағы оқиғаларға қатысқандарға әлеуметтік көмек көрсетіледі.
Бұл туралы astana.kz сайтына қалалық Жұмыспен қамту және әлеуметтік бағдарламалар басқармасынан хабарлады.
«Қазақстан Республикасының Тәуелсіздік күніне орай жергілікті бюджет қаржысы есебінен 1986 жылғы 17-18 желтоқсандағы оқиғаларға қатысқандардың ішінен оқиғалар кезінде қасақана кісі өлтіргендер мен милиция қызметкерінің, халық жасақшыларының өміріне қастандық жасағандардан басқа (оларға қатысты қазіргі қылмыстық істерді қайта қарау тәртібі сақталады), саяси қуғын-сүргін құрбандарына 20 мың теңге көлемінде бір реттік ақшалай төлем түрінде әлеуметтік көмек көрсетіледі», - делінген хабарламада.
Сонымен қатар, Тәуелсіздік күніне орай елордалық ведомстволарға қарасты мекемелерде қарттарға, тұрақты тұратын орны жоқ тұлғаларға, сондай-ақ, мүмкіндігі шектеулі балаларға арналған бірқатар іс-шаралар ұйымдастырылады.
