Елордада бірнеше нысанға «бомба қойылды» деген жалған ақпарат тарады

НҰР-СҰЛТАН. ҚазАқпарат – Нұр-Сұлтан қаласында бірнеше нысанға бомба қойылғаны туралы жалған хабарлама тарады, деп хабарлайды ҚазАқпарат тілшісі қалалық полиция департаментінің баспасөз қызметіне сілтеме жасап.

«Бүгін «102» арнасына «My car» және «Lexus» автосалондарының, сондай-ақ «Хан Шатыр» және «Mega Silk Way» сауда және ойын-сауық орталығының электронды мекенжайына жарылғыш құрылғылар қойылғаны туралы хабар келіп түскен», - дейді полиция департаментінен.

Хабарламада айтылғандай, қазір жедел қызмет аталған нысандарды тексерумен айналысып жатыр.

Осы орайда Нұр-Сұлтан қаласының Полиция департаменті жарылғыш құрылғылардың қойылғаны туралы көрінеу жалған хабарлама таратқаны үшін қылмыстық жауап көзделетінін ескертеді.

«Азаматтардан дүрбелең тудырмай, өткізіліп жатқан іс-шараларға түсіністікпен қарауларыңызды сұраймыз», - делінген мәліметте.