Елордада ем қабылдап жатқан балалар да мерекелік сыйлықтан құр қалмайды

АСТАНА. ҚазАқпарат - 1 маусым күні «Таза ниет - Астана» қоғамдық қоры Астана қаласының Денсаулық сақтау басқармасымен және «Ұлттық Дельфий комитеті» корпоративтік қорымен бірлесе Халықаралық балаларды қорғау күніне орай №2 қалалық балалар емханасында стационарлық ем алып жатқан балаларға арналған «Бақыт сыйла» қайырымдылық акциясын өткізеді, деп хабарлады қалалық әкімдіктің баспасөз қызметінен.

Қайырымдылық шараның мақсаты стационарлық ем қабылдап жатқан балаларға нағыз мереке, шаттық сыйлау; балалардың бойында әлеуметтік белсенділік дағдылары мен жауапкершілікті қалыптастыру; балалардың өзара араласуына көмектесу. Мерекелік акция аясында балалар ұжымдарының қатысуымен концерт ұйымдастырылып, астаналық цирк әртістері шоу ұсынады. Сондай-ақ, балаларға тәттілер мен сыйлықтар таратылады. Сондай-ақ, №6 қалалық емханада қызметкерлердің балалары үшін волонтерлардың қатысуымен «Балалық шақ - балалар!» акциясы өтеді. Шараның мақсаты - Халықаралық балаларды қорғау күнін мерекелеу, балалар мен ата-аналардың қарым-қатынасын жақсарту, денсаулықтарын нығайту, бір-біріне деген сенімді арттыру. Ал, қалалық №1 емханада Халықаралық балаларды қорғау күніне арналған «Мен бейбітшілікті саламын» асфальттағы суреттер жарысы өтеді.