Елордада есік сатушы әйел азаматтарды алдап, 31 млн теңгеден астам қаражатты иемденіп алған

НҰР-СҰЛТАН. ҚазАқпарат – Елордада «Elit Interior» құрылыс дүкенінің сатушы-менеджері азаматтарды ішкі есіктер сатамын деп алдап, ақшасын заңсыз иемденіп алған, деп хабарлайды ҚазАқпарат Нұр-Сұлтан қаласы полиция департаментінің баспасөз қызметіне сілтеме жасап.

49 жастағы әйел есіктерді сатып алушылардың мекенжайына жеткізіп беруді уәде етіп, олардан алған қолма-қол ақшаны кассаға салмай жүрді. Дүкен басшылығы сатушысының айла-шарғысынан бейхабар болып шықты.

Клиенттердің қаражатын иемденген әйел оны жеке қажеттілігіне, көп бөлігін «Лото клубтағы» ставкаларға жұмсаған. Алаяқ әйелдің әрекетінен оған 500 мыңнан 2 млн теңгеге дейінгі сомадағы ақшасын ұстатқан 26-ға жуық азамат зардап шекті. Келтірілген жалпы шығын шамамен 31 млн теңгені құрады.

Мәселен, 3 сәуір күні полицияға шағымданып келген қала тұрғыны менеджерге 1 865 740 теңге төлегенін, бірақ тауар алмағанын айтты. Сол күні тағы бір тұрғын сатушының оны алдап, 1 100 000 теңге ақшасын иемденгенін хабарлады.

Криминалдық полиция қызметкерлері күдікті әйелді ұстады, ол өз кінәсін мойындады. Алаяқтықтың барлық фактілері бойынша сот алдындағы тергеу амалдары жүргізілуде