Елордада Есіл өзенінде кеме жүзу маусымы ашылады
АСТАНА. ҚазАқпарат - Есіл өзенінде 15 мамырда кеме жүзу маусымы ашылады. Салтанатты рәсімге мүгедек балаларға арналған интернат үйінің тәрбиеленушілері, ҰОС ардагерлері және елорданың құрметті қонақтары қатысады.
Бұл туралы Қала өмірі тіршілігін қамтамасыз ету және инфрақұрылымды дамыту бөлімі хабарлады деп мәлім етті Астана қаласы әкімі аппаратының баспасөз қызметінен. Бүгінгі таңда Есіл өзеніндегі кеме жүзу бағдарының ұзындығы 9 шақырымға шақ. Кәсіпорын флотында сегіз кеме қызмет көрсетуге сақадай-сай дайын. Оның қатарында сыйымдылығы 69, 60, 32 және 45 адамдық 5 жайлы жолаушылар кемесі, сонымен қатар құтқару катерлері мен сүйреуіш кемелер бар. Қазіргі уақытта Астанада «Кенесары» және «Рэдиссон» атты 2 айлақ құрылған. Жолаушыларға ыңғайлы болу үшін айлақ саялы шатырмен жабылған 8 жайлы қалқымалы айлақпен жабдықталған.
