Елордада «IntelHouse.EcoCity-2013» көрме-конференциясы ұйымдастырылады

АСТАНА. 13 қараша. ҚазАқпарат - Елордада «EXPO-2017» халықаралық мамандандырылған көрмесі қарсаңында энергия үнемдегіш технологиялар мен жасыл экономика саласындағы түрлі іс-шаралар қолға алынды. 20-22 қарашада Астанада әлемнің жетекші технологияларын ұсынатын «IntelHouse.EcoCity-2013» көрме-конференциясы ашылады. Іс-шара аталған саладағы барлық өндірушілер мен тұтынушылар үшін бизнес алаңға айналмақ.

Аstana.kz сайтының жазуынша, іс-шара аясында келушілердің назарына құрылысқа, қауіпсіздік жүйесіне, жарықтандыруды, климатты басқару жүйесіне арналған озық жүйелер мен технологиялар, энергия үнемдегіш технологиялар, ғимаратты басқарудың зияткерлік жүйелерінің жаңа технологиялық шешімдері ұсынылады.

Конференция жұмысына жаңа технологияларды жасау және енгізудегі әлемдік көшбасшылар қатысады, онда үйлерді жобалау және салу саласындағы әлемдік тәжірибемен, жаңартылатын энергия көздерімен, тұрғын үй-коммуналдық шаруашылықты жаңғыртумен танысып, көзбен көру мүмкіндігі туады.

Бұдан басқа, көрме аясында өтетін конференцияға қатысушылар құрылыс пен кез-келген мақсатта салынып жатқан нысандарды жарақтаудың жаңа технологияларымен танысады. Айта кетейік, іс-шара барысында мамандар «жасыл» құрылысқа, балама және жаңартылатын энергия көздері мен энергия үнемдегіш технологияларға қатысты мәселелерді қарастырады.

Еске салайық, «IntelHouse.EcoCity-2013» көрме-конференциясы 20-22 қарашада «Көрме» орталығында өтеді.