Елордада қар аралас жаңбыр жауып, найзағай ойнайды
НҰР-СҰЛТАН. ҚазАқпарат - Нұр-Сұлтан қалалық Төтенше жағдайлар департаменті ертең елордада ауа райы күрт құбылатынын хабарлады.
Қазгидрометтің мәліметінше, 30 сәуірде күндіз қар аралас жаңбыр жауып, найзағай ойнайды. Көктайғақ болып, бұршақ түсуі мүмкін. Солтүстік-батыстан жел соғып, оның жылдамдығы 15-20 м/с-ке жетуі ықтимал. Ауа температурасы күндіз 0-2 градусқа дейін төмендейді.
Осыған байланысты ТЖД қала тұрғындары мен қонақтарының назарына мынадай нұсқаулықтар ұсынды:
- мұқият болыңыз, ауа райының өзгеруі туралы ақпаратты және жарияланған шектеулерді жіті қадағалаңыз;
- көшеде бағандардан, ағаштардан, жарнамалардан, ЭЖЖ және сымдардан алыс жүруге тырысыңыз;
- құрылыс объектілері халықты және аумақты қолайсыз ауа райы жағдайларының салдарынан қорғау туралы қосымша шаралар қабылдасын. Мүмкіндігінше құрылыс объектілеріндегі құрылыс-монтаж жұмыстарының қызметін шектесін;
- автокөлігіңізді гаражға қойыңыз, гараж болмаған жағдайда ағаштардан және ескі құрылыстардан алыс қойыңыз;
- пәтер мен үйлерде барлық терезелерді нық жабыңыз;
- үй-жайларда терезеден алшақ тұрып, электр құралдарды қолданбауға тырысыңыз;
- автокөлік құралын басқарып келе жатсаңыз, оны тоқтатуға тырысып, тұраққа қойыңыз. Ауа райы салдарынан жол бағытын көру нашарлап, найзағай жарқылы жүргізуші көзіне шағылысады, осының салдарынан жол-көлік оқиғасы болуы мүмкін;
- найзағай кезінде су қоймаларында суға шомылуға, балық аулауға болмайды.
Сондай-ақ, төтенше жағдай туындаған жағдайда «112» нөміріне қоңырау шалуға болады.
