Елордада қар тазалауға 1700-ден астам арнайы техника жұмылдырылды

Қардың мол жаууына байланысты Астананың коммуналдық қызметкерлері тәулік бойы күшейтілген режимде жұмыс істеп, қала көшелерінің қарын тазартып жатыр, деп хабарлайды Kazinform елорда әкімдігінің ресми сайтына сілтеме жасап. 

Күндізгі ауысымда көшелердің қарын тазартуға 1 700-ден астам арнайы техника мен 2 500-ге жуық жол жұмысшы шықты. 

Ең алдымен, ережеге сәйкес, жолдарда кептеліс болмас үшін қозғалысы өте қарқынды көшелердің қары аршылады. Сондай-ақ қарқындылығы орташа учаскелер – алаңдар, вокзал маңы аумағы, тротуарлар, әлеуметтік нысандарға кірме жолдар және т.б. қардан тазартылады. 

Астанада 7-8 қаңтар аралығында 37 мың текше метрден астам қар шығарылды, бұл 2 802 жүк рейсін құрайды. 

Қыс мезгілінің басынан бастап елордада 1 436 205 текше метр қар шығарылды, бұл 105 мыңнан астам ауыр жүк рейсін құрайды. 

«Қазгидромет» РМК хабарлауынша, Астанада 8 қаңтар күні қалың қар жауып, кей уақытта боран соғады. Оңтүстік-батыстан 9-14, екпіні 15-20 м/с жел соғады. Ауа температурасы түнде және күндіз – 0-2 градус.