Елордада көмір сататын орындарда дүрбелең жоқ – Қанат Көбесов

НҰР-СҰЛТАН. ҚазАқпарат – «ҚТЖ-Жүк тасымалы» ЖШС бас директорының орынбасары Қанат Көбесов елорданы көмірмен қамтамасыз етуге қатысы жағдайға түсініктеме берді, деп хабарлайды ҚазАқпарат тілшісі.

«Айтарлықтай дүрбелең (көмір сатылатын темір жол тұйықтарында) жоқ. Орын алған дүрлігу алыпсатарлық, яғни ол көмір сатушылармен тікелей байланысты. Қарапайым ғана статистикалық дерек келтіре кетейін, қазан айының 7 күнінің ішінде Нұр-Сұлтанға 171 вагон көмір түсірдік», - деді Қанат Көбесов елорданың көмір сататын тұйықтарына баспасөз-туры барысында.

Оның атап өтуінше, көмір таңдауда да тұрғындарға ешқандай проблема туындамауы тиіс.

«Бізде Майкөбе, Шұбаркөл, Қаражыра сынды кеніштерден әкелінген әртүрлі көмір бар. Бізге өтінімдердің бәрін қабылдап алушы береді. Нұр-Сұлтанда 8 темір жол тұйығы және 14 қабылдап алушы бар. Қабылдау алушылар халыққа көмір сатумен де айналысады. Елордаға шамамен 10 мың тонна көмір керек. Бүгін Нұр-Сұлтан стансасында 20 вагоннан көмір түсірілді. Қабылдау алушылар берген өтінімге сәйкес қажеттілікті толық жабамыз», - деді ол.

Айта кетейік, Нұр-Сұлтан қаласында 14 кірме темір жолы бар. Баспасөз-туры барысында аталған жолдарда көмір тиелген 75 вагон тұрды. Бұған қоса 138 вагон көмір жолда. Олар таяу күнде елордаға жеткізілмек.