Елордада ҚР Президенті жүлдесі үшін қазақ күресінен «Қазақстан Барысы» мерейтойлық турнирі өтеді
АСТАНА. ҚазАқпарат - Бүгін, 4 шілде күні елордадағы «Сарыарқа» велотрегінде Ұлт көшбасшысы - Қазақстан Республикасының Президенті Н.Ә.Назарбаевтың жүлдесі үшін қазақ күресінен «Қазақстан Барысы» V республикалық турнирінің финалдық кезеңі өтеді.
Биыл бесінші рет ұйымдастырылатын «Қазақстан Барысы» турниріне еліміздің әр аймағынан іріктелген 32 балуан мен былтырғы жылғы жарыстың жеңімпазы Мұхит Тұрсынов жолдама алып отыр. «Қазақстан Барысы» V республикалық турнирінің жүлде қоры 225 000 АҚШ долларын құрайды. Оның ішінде 35 мың АҚШ доллары спортшылардың жаттықтырушыларына тағайындалған. Жүлде қоры төмендегідей: 1-орын - 150 мың АҚШ доллары; 2-орын - 30 мың АҚШ доллары; 3-орын - 10 мың АҚШ доллары. Доданың бас демеушісі «Самұрық-Қазына» Ұлттық әл-ауқат қоры» АҚ болып табылады.
