Елордада пәтер тонаумен айналысқан қылмыстық топ құрықталды

Бұл туралы бүгін брифингте Астана қалалық ішкі істер департаменті мемлекеттік тіл және ақпарат бөлімінің бастығы Нұрділдә Ораз мәлім етті.

2011 жылғы 2 ақпанда Астана қалалық ІІД ҰҚКБ қызметкерлері пәтер тонауға қатысы бар деген күдікпен ұйымдасқан қылмыстық топты анықтады. Ұсталған 5 азаматқа Ж. есімді Астана тұрғынының пәтерін тонап, 28 млн. 908 мың теңге көлемінде шығын келтірді деген айып тағылып отыр», - деді ол.

Оның айтуына қарағанда, күдіктілерді құрықтау барысында жүргізілген тексеріс нәтижесінде қылмыскерлердің пәтер тонауға қатыстылығын дәлелдейтін бірнеше заттай дәлелдемелер табылған. Қылмыстық топтың барлық мүшелері қазіргі уақытта тергеу изоляторына қамалды. Сондай-ақ тергеу барысында бұл қылмыстық топтың елордалық тағы бір «Б» есімді азаматтың пәтерін тонап кеткені анықталған.

«Үй иесі 9 300 000 теңгеге бағаланатын бірнеше құнды мүлігін қылмыскерлердің қолды қылғанын айтады. Жедел-тергеу шараларын жүргізу кезінде күдіктілердің бірі пәтер тонауға қатысты үш қылмысқа барғанын мойындады. Қазіргі уақытта ұйымдасқан қылмыстық топтың бұған дейін жасалған өзге де қылмыстарға қатыстылығы тексеріліп жатыр», - деді Н.Ораз.