Елордада шомылу маусымы қашан басталады
АСТАНА. ҚазАқпарат – Биылғы шомылу маусымында Астанадағы су қоймаларында 50 сүңгуір-құтқарушы патрульдейді. Қалалық Төтенше жағдайлар департаменті Азаматтық қорғаныс басқармасының бастығы Азамат Құсайынов әкімдіктің баспасөз мәслихатында осында мәлімет айтты, деп хабарлайды ҚазАқпарат тілшісі.
«Шомылу маусымы кезінде күнделікті патрульдеу шараларына 50 сүңгуір-құтқарушы, сүңгуір жабдықтары орнатылған 15 жедел құтқару техникасы, 6 жұзу құралы, жұмыспен қамту орталықтарының жұмысшылары жұмылдырылады», - деді ол.
Басқарма басшысы су температурасы +18 градустан төмен болғанда шомылуға болмайтынын еске салды.
«Суға шомылу маусымы жыл сайын 1 маусымда ашылады. Арнайы жабдықталған орындарда, жағажайларда, бассейндерде және құтқарушылар патрульдейтін орындарда шомылу керек. Сау, шыныққан адамдар үшін қауіпсіз шомылуға арналған судың ең төменгі шекті температурасы +18 градус, ауаның шекті температурасы +22 градус. Балалар мен денсаулығы әлсіз адамдар үшін мұндай температурада суға түсу денсаулық пен өмірге қауіпті», - деді Азамат Құсайынов.
