Елордада жедел жәрдем көлігі апатқа ұшырады

НҰР-СҰЛТАН. ҚазАқпарат – Елордада жедел жәрдем көлігі апатқа ұшырады, деп хабарлайды ҚазАқпарат тілшісі.

«21 тамызда сағат 18:40 кезінде «Toyota Corolla» көлігін тізгіндеген 26 жастағы жүргізуші Керей, Жәнібек хандар көшесі жағынан Қабанбай батыр даңғылы бойымен келе жатып, Орынбор көшесінің қиылысында бағдаршамның белгісімен солға қарай бұрылар кезде басқа көлік құралына жол бермеген. Осының салдарынан «Hyundai» маркалы жедел жәрдем көлігімен соқтығысты», - делінген қалалық Полиция департаменті баспасөз қызметінің мәліметінде.

Жол-көлік оқиғасы салдарынан «Toyota Corolla» жүргізушісі мен жедел жәрдем бригадасы қызметкерлері түрлі жарақатпен ауруханаға жеткізілді. Осы ЖКО бойынша тексеру шаралары жүріп жатыр.