Елордада жөндеу жұмыстарына байланысты екі көше 25 тамызға дейін жабылады

НҰР-СҰЛТАН. ҚазАқпарат - Жөндеу жұмыстарына байланысты Бигелдинов пен Жұбанов көшелері 25 тамызға дейін жабылады. Осыған байланысты елорда тұрғындары мен қонақтарына маршрутты алдын-ала жоспарлау ұсынылады, деп хабарлайды ҚазАқпарат тілшісі.

Әкімдіктің ақпаратына сәйкес, 23-25 тамыз аралығында жол-құрылыс жұмыстарына байланысты Нұр-Сұлтанда бірқатар көшелер жабылады.

Орташа жөндеу аясында Бигелдинов көшесінде Сарыарқа даңғылынан Жеңіс даңғылына дейінгі учаскеде жұмыстар жүргізілуде. Осыған орай, 23-25 тамыз аралығында көлік қозғалысын толығымен жабу жоспарланған.

Сондай-ақ Жұбанов көшесінде Абай даңғылынан көшенің соңына дейін жол құрылысы жүріп жатыр. Дәл осы мерзімде қозғалыс тоқтайды.

«Елорда тұрғындары мен қонақтары қала жолдарында кептеліс тудырмау үшін баратын бағытын алдын-ала жоспарлау керек. Келтірілген қолайсыздықтар үшін кешірім өтінеміз және жөндеу жұмыстарына түсіністікпен қарауды сұраймыз», – деді елорданың көлік және жол-көлік инфрақұрылымын дамыту басқармасының өкілдері.