Елордадағы Ақбұлақ өзенінің жағалауы салтанатты түрде ашылды
«Алатау» спорт сарайының жанындағы алаңда концерттік бағдарлама ұйымдастырылды, ал аниматорлар кішкентай бүлдіршіндердің көңілін көтерді.
«Мұндай іс-шаралардың ашық аспан астында өткені керемет. Біз жақын жерде тұрамыз. Жалпы, маған Елорда күні ұнайды. Қала күн санап өзгеріп жатыр, үнемі болмаса да, көптеген қызықты іс-шараға баруға болады», - деп ой бөлісті астаналық Александра Феоктистова.
Іс-шараның ерекшелігі – кез келген адам өз тілегін білдіре алатын алғыс тақтасы қойылған. Ұйымдастырушылардың айтуынша, бұл тақтайға ата-анаға, балаға, жұбайына, қалаға, әлемге «рақмет» деп жазуға болады.
«Маған Астанамыздың барынша көркейгені ұнайды. Бүгін қаламыздың 25 жылдығы аталып өтіп жатыр. Бұл мереке балалар мен ересектерге ерекше көңіл-күй сыйлайды, ал жағалау маңайы айтарлықтай өзгерді», - дейді қала тұрғыны Арман Кеңесов.
Сондай-ақ, Байқоңыр ауданында өткен іс-шарада меценаттар әлеуметтік осал топтардың балаларына маусымдық киім сатып алуға сертификаттарын табыстады.
Айта кетейік, биыл Ақбұлақ өзенінің жағасында Амман көшесінен Тәуелсіздік даңғылына дейін асфальт төселді, балалар ойын алаңы мен workout-аймақтар, көпір астындағы жаяу жүргіншілер өткелі жабдықталды. Сондай-ақ, мұнда 25-тен астам орындық пен қоқыс тастайтын жәшіктер, 20-дан астам жарықтандыру тірегі орнатылып, 90-нан астам ағаш отырғызылды.
