Елордадағы хайуанаттар бағында маймыл баланың саусағын тістеп алды
«Сенбі күні өз балаларыма ертіп жиенімді «Ажар» («Astana Mall») сауда орталығындағындағы жанама хайуанаттар бағына апардым. Маймылды тамашалап болған соң, оған тамақ бердік, сосын бізді ертіп жүргенхайуанаттар бағының қызметкері түлкіні ұстап көріңіздер деп кеңес берді. Түлкінің торы маймылдың жанында еді. Бізді ертіп жүрген қыз бірінші болып түлкінің торына кірді, артынан менің балаларым ере кірді, соңынан мен кірдім. Ол қыз маған тордың есігін жауып қойыңыз деді. Мен есікті жабайын деп бұрыла бергенде, жеміс-жидек салынған стаканды ұстап тұрған жиенім маймылдың торына қарай қысылып қалғандай болды да, саусағын шошайтып тұр екен...Сол сәтте маймыл жиенімнің саусағын тістеп алыпты. Бала қатты жылап тұрды, мен айқай салдым, ал хайуанаттар бағының қызметкері түк болмағандай тұра берді»,-деп жазған инстаграмдағы klepa_89bk.ru атты пайдаланушы (автордың стилистикасы сақталды).
Оның айтуынша, жануарлар бағының қызметкерлері балаға алғашқы көмек көрсетпеген екен.
«...Маймылдың денсаулығы туралы құжаттарды сұраттым, бірақ, маймылға құтыруға қарсы екпе егілгені туралы құжат жоқ екен. Баланы ауруханаға апарып, құтыруға қарсы екпе қойғыздым. Енді бір ай бойы сол екпені аламыз»,-деп толықтырған ол жазбасын.
Хайуанаттар бағын басқарушының көмекшісі Нұрлан Күшекпаевтың айтуынша, жануарлар бағына келген әрбір адам қауіпсіздік ережесімен танысады және жануарлардың торына саусақ шошайтуға болмайды. Оның айтуынша, маймыл құтыру ауруына қарсы екпе алған.
«Маймыл тұрған торға адамдарды кіргізбейміз. Келген адамдар ережемен танысқаны туралы журналға қол қояды. Біз ол адамдарға кірген билеттерінің бағасы қайтардық. Маймыл егілген. Мен жануарларға арналған мал дәрігерінің халықаралық паспортын көрсеттім, бірақ, келген әйелдің күйеуі басқа бетті суретке түсіріп алыпты. Хайуанаттар бағының қызметкерлері қыздың саусағын арнайы майлықпен тазалап берді»,-деп хабарлады ол.