Елордалық пара спортшы Айсұлу Сүлейменова халықаралық турнирдің күміс жүлдегері атанды
АСТАНА. KAZINFORM – Астана қаласының пара спортшысы Айсұлу Сүлейменова Дубай қаласында өткен жеңіл атлетикадан «Dubai 2024 World Para Athletics Grand Prix 15th Fazza International Athletics Championships» турнирінде Т62 класы бойынша сәтті өнер көрсетіп, жеңіс тұғырынан көрінді. Бұл туралы елорда әкімдігінің ресми сайты хабарлады.
Осылайша, жерлесіміз байрақты бәсекеде мәре сызығын екінші болып кесіп, халықаралық жарыстың күміс жүлдегері атанды.
Айта кетсек, аталған дода — спортшының алғашқы халықаралық жарысы.
«Жалпы жарыс қиын болды. Бірақ соған қарамастан бар күшімді салып, жеңіске жетуге тырыстым. Бұл менің алғашқы жарысым болғандықтан, өте қуаныштымын. Айтулы жеңіс менің ғана емес, барша команданың жеңісі деп санаймын. Әсіресе, жеке бапкерім Айгүл Аржаниковаға шексіз алғысымды білдіремін. Онымен бірге көп еңбектендік. Қолдау білдірген барлық жандарға, қалалық спорт басқармасына және елорда спорт мектебінің әкімшілігіне рақметімді айтамын», — деді пара спортшы.
Бүгін елордалықтар Дубай қаласынан жүлделі екінші орын иеленген Айсұлуды халықаралық әуежайдан қарсы алды.
Жанкүйерлері мен жақын достары астаналық пара спортшыны құшақ жая қарсы алып, ерекше құрмет көрсетті.
