Елордалық балуандар белбеу күресінен ел чемпионатында командалық есепте үздік шықты
АЛМАТЫ. Қыркүйектің 15-і. ҚазАқпарат /Ерлік Ержанұлы/ - Белбеу күресінен 23 жасқа дейінгі жастар арасында Астанада өткен Қазақстан чемпионатында елордалық балуандардың мерейі үстем болды.
Екі күнге созылған бұл жарысқа еліміздің 9 аймағынан 109 спортшы қатысқан болатын. Онда ақмолалық А.Мұстафин (90 кг), атыраулық Н.Ыстыбаев (60 кг), павлодарлық Р.Демесінов (55 кг) пен Т.Сейілов (73кг), және астаналық С.Талайбек (81 кг), Э.Осконов (100 кг), Н.Алтынбеков (+100 кг) өз салмақ дәрежесінде чемпион атанды. Елорданың намысын бұл жарыста «Астана батыры» жекпе-жек клубының шәкірттері қорғаған болатын. Олар командалық есепте 4 алтын, 3 күміс және 2 қола жүлдемен бірінші орынды жеңіп алды. Екінші орынды Павлодар облысы иеленді. Жүлделі үштікті Ақмола облысы түйіндеді. Ел чемпиондары енді Әлем және Азия чемпионатында өнер көрсететін болады.
