Елордалық оқушылар коронавирусқа қарсы екпені қайда салдырады
НҰР-СҰЛТАН. ҚазАқпарат – Елордалық оқушылар коронавирусқа қарсы екпені қайда салдырады? Бұл сұраққа Нұр-Сұлтан қаласының қоғамдық денсаулық сақтау басқармасының басшысы Тимур Мұратов жауап берді, деп хабарлайды ҚазАқпарат.
Қалалық мәслихаттағы тұрақты комиссияның отырысында депутаттар коронавирус инфекциясына қарсы вакциналауға қатысты оқушылардың ата-аналарын ақпараттандыру жұмыстары белсенді түрде басталғанын атап өтті.
Отырыста мәслихат депутаттары мектеп оқушыларын вакциналауды мектептерде емес, емханаларда жүргізуді сұрады, өйткені ата-аналардың вакцинаға келісімі қажет және балаларын өздері ертіп жүруі керек.
«Бірінші кезеңде біз міндетті түрде тек емханада вакциналаймыз, өйткені вакцина жаңа, оны жан-жақты қарастырамыз. Әрі қарай балалар жаппай вакцина алуды қаласа, орын мәселесін шешуге тырысамыз», - деп жауап берді Тимур Мұратов.
