Елорданың шет аймақтарын дамыту: кейінгі 4 жылда 237 көшеге асфальт төселді
АСТАНА. ҚазАқпарат – Соңғы 4 жылда елорданың тұрғын алаптарында жүргізілген орташа жөндеу барысында 237 көшеге жалпы ұзындығы 80 шақырым болатын асфальт төселді. Бұл туралы бүгін бас шаһардың маслихатында баяндама жасаған Астана қалалық Көлік және жол-көлік инфрақұрылымын дамыту басқармасы басшысының міндетін атқарушы Мерей Байырхан айтты, деп хабарлайды ҚазАқпарат тілшісі.
Оның айтуынша, Астана қаласының тұрғын алаптарын дамыту мақсатында 2010 жылы «Астана қаласының шет аумақтарын дамыту тұжырымдамасы» қабылданған. Оған сай, 2011-2022 жылдар аралығында 133 шақырым жол мен ұзындығы 371 шақырым инженерлік желілер салынды.
«Осы тұжырымдамаға сәйкес, 2019-2022 жылдары Көктал-2, Көктал-1, Комсомольский, Интернациональный, Достық, Оңтүстік-Шығыс тұрғын алаптарында инженерлік желілер мен жолдар салынды. Осы жылдар ішінде 63,3 шақырым инженерлік желі, сондай-ақ 25,3 шақырым жол салынды. Сондай-ақ, соңғы 4 жылда қаланың тұрғын алаптарын орташа жөндеу аясында жалпы ұзындығы 80 шақырым болатын 237 көше асфальт төселіп, жөнделді», - деп тоқталды Мерей Байырхан елорда мәслихатының отырысында.
