Елорданың жедел әрекет ету қызметтері: өзендегі мұз әлі жұқа әрі қауіпті
АСТАНА. ҚазАқпарат - Алғашқы мұз конькимен сырғанауға, балық аулауға ғана емес, жолды қысқартып, сықырлақ мұздың үстімен жүруге де ынтықтырып тұрады. Шын мәнінде, мұз әлі жұқа және адам салмағын көтере алмайтындықтан өте қауіпті болып табылады.
Осыған байланысты елордалық жедел әрекет ету қызметтері қала тұрғындары мен қонақтарына күзгі жұқа мұздың қауіптілігі жайында ескертеді және балаларды қараусыз қалдырмауға шақырады.
Мамандардың айтуынша, бақытсыз жағдайларға жол бермеу үшін қауіпсіздік шараларын сақтау керек. Мұздың қалыңдығы 10-12 см-ге жеткен кезде ғана оның бетіне шығу қауіпсіз болады. Сондай-ақ, мұздың беті қармен жабылған жерлермен жүрмеуге тырысқан абзал, себебі ондай жерлерде мұз әлдеқайда баяу қатады. Кей жағдайларда су айдынының бетіндегі мұздың қалыңдығы 10 см-ді құраса, ал қардың астында қалыңдығы 3 см-ді құрайды.
Астана қаласының ТЖД хабарлауынша, ағымдағы жылдың 6 қарашасында Есіл өзеніндегі ойыққа малту кезінде 1964 жылы туған ер азамат суға батып кетті.
