ЕО елдерінің көпшілігі ішкі шекараларда бақылауды қалпына келтіріп жатыр

АСТАНА. KAZINFORM – Нидерландта Германия мен Франциядан кейін ішкі шекараларда бақылау енгізу жоспарланып отыр.

Германия бұған дейін өз шекараларында күшейтілген қауіпсіздік тексерістерін енгізген еді, бұл шекараларда кептеліс пен кезектің түзілуіне себеп болды. 

Осыған ұқсас шаралар Францияда да енгізілді. Францияның қазіргі шекаралық бақылауы 31 қазанда аяқталады, бірақ 1 қарашада тексерудің жаңа жинағы күшіне енеді. Франция ішкі шекаралық бақылауды келесі жылдың сәуір айына дейін ұзартатынын мәлімдеді. 

Шенген келісімі аясында бақылау Францияның Бельгия, Испания, Люксембург, Швейцария, Германия және Италиямен шекараларында енгізіледі.

Енді Францияға немесе Германияға көлікпен саяхаттайтындар екі шекарада да тексерістен өтуі мүмкін екенін білуі керек.

Бұл ретте Еуропа елдерінің билігі бұл заңсыз көші-қонды бақылау қажеттілігіне байланысты уақытша шаралар екенін атап өтті. 

Аустрия да 11 қарашаға дейін Словения және Венгриямен шекарадағы бақылауды күшейтті.

Дания, Норвегия және Швеция 11 қарашаға дейін барлық ішкі шекараларында бақылауды күшейтті.

Словенияда Хорватия және Венгрия шекарасында тексеру ағымдағы жылдың 21 желтоқсанына дейін жүргізіледі. 

Бұған дейін Германияның барлық құрлық шекараларында бақылау енгізіп жатқаны хабарланған болатын.