ЕО-ға мүше төрт мемлекеттің басшысы Газада атысты тоқтатуға шақырды
Испания премьер-министрі Педро Санчес, Бельгия премьер-министрі Александр Де Кроо, Ирландия премьер-министрі Лео Варадкар және Мальта үкімет басшысы Роберт Абела Еуропалық кеңес басшысы Шарль Мишельге Еуроодақтың алдағы саммитінде Газадағы жағдайды қарастыруды және ондағы ұзақ гуманитарлық атысты тоқтатуға бірлесіп шақыруды сұрап хат жолдады, деп хабарлайды Kazinform агенттігінің тілшісі.
Еуропалық Одақ мемлекет және үкімет басшыларының саммитін 14-15 желтоқсанда Брюссель қаласында өткізу жоспарланған. Еуроодақтың 27 мемлекетінің басшылары онда Еуропалық Одақтың ішкі және сыртқы саясатының өзекті мәселелерін талқылауға ниетті.
ЕО-ға мүше төрт елдің үкімет басшыларының хатына 2024 жылдың 1 қаңтарынан бастап Еуропалық Кеңеске Бельгия қабылданатын Испания төрағалығының соңғы кезеңінде қол қойылды.
Испания, Бельгия, Ирландия және Мальта көшбасшыларының пікірінше, халықаралық қауымдастықтың шұғыл шаралар қабылдауы және Еуропалық кеңесте жағдайды байыпты талқылауы өте маңызды. Алдағы пікірталаста олар барлық 27 мемлекет Израиль мен ХАМАС арасындағы қақтығыс пен оның гуманитарлық салдары туралы нақты және берік позиция ұстануын сұрайды.
Еуроодақтың төрт мемлекеті ХАМАС ұйымының 7 қазандағы лаңкестік әрекетін айыптап, Израильдің халықаралық құқық бойынша қорғаныс құқығын мойындайды, сондай-ақ кепілге алынғандарды ішінара босатуға және гуманитарлық көмекті арттыруға мүмкіндік берген гуманитарлық үзіліске қанағаттанатындықтарын білдірді.
Бірақ Испания, Бельгия, Ирландия және Мальта өкілдерінің атап өтуінше, ЕО бұдан әрі қарай соғыс қимылдарын тоқтатуды, Газа секторындағы бейбіт тұрғындардың қорғалуын және палестиналықтарға гуманитарлық көмектің кедергісіз жетуін талап етіп, мұны әдейі болдырмау халықаралық құқыққа қайшы болуы мүмкін екенін ескертуі тиіс.
