Ерлан Қарин елордадағы WTT Star Contender турнирінің жеңімпаздарын марапаттады
АСТАНА. KAZINFORM — Вице-президенті Ерлан Қарин Астанада алғаш рет өткен үстел теннисінен WTT Star Contender санатындағы халықаралық турнирдің жеңімпаздары мен жүлдегерлерін марапаттау рәсіміне қатысты.
— Осы күндері еліміз үстел теннисінен кезекті халықаралық ірі турнирді қабылдады. Астанада тұңғыш рет WTT Star Contender санатындағы дода ұйымдастырылды. Жарыс Қазақстан Республикасы Президентінің Ашық Кубогы аясында өтті, — деп жазды Ерлан Қарин.
Бұл турнирге әлемнің 29 елінен 160 спортшы қатысты.
Ерлан Қарин әлеуметтік желідегі жазбасында финалдық ойындарды тамашалап, жеңімпаздар мен жүлдегерлерді марапаттау рәсіміне қатысқаны туралы жариялады.
— Мұндай ауқымды турнирді елімізде өткізудің маңызы зор. Біріншіден, бұл жастарды спортқа ынталандырып, тенниске деген қызығушылығын арттырады, — деді Вице-президент.
Ерлан Қарин бұл жарыстың 2027 жылы Қазақстанда өтетін үстел теннисінен әлем чемпионаты қарсаңында маңызды екенін атап өтті.
— Бүгінгі турнир әлем біріншілігі алдындағы өз алдына бір дайындық іспетті. Қазақстан үстел теннисінен жаһан чемпионатын қабылдайтын Орталық Азиядағы алғашқы ел болмақ, — деді Вице-президент.
Айта кетейік, елімізде үстел теннисінен Қазақстан Президентінің ашық кубогі 15-20 қыркүйек аралығында елордадағы Жақсылық Үшкемпіров атындағы жекпе-жек сарайында өтті.
Бұған дейін Мемлекет басшысы Халықаралық үстел теннисі федерациясының (ITTF) президенті Петра Сёрлингті қабылдады.
