Ерлан Қарин мектептегі тәрбие бағдарламасына қатысты жиын өткізді
АСТАНА. KAZINFORM – Мемлекеттік кеңесші Ерлан Қариннің төрағалығымен жалпыұлттық құндылықтарға негізделген «Адал азамат» атты жаңартылған тәрбие бағдарламасын жүзеге асыру мәселелері жөнінде жиын өтті. Бұл туралы Ақорданың баспасөз қызметі хабарлады.
Басқосуда Оқу-ағарту министрі Ғани Бейсембаев пен Бала құқықтары жөніндегі уәкіл Динара Зәкиева баяндама жасады.
Ерлан Қарин бағдарламаның негізгі міндеті өскелең ұрпаққа тәлім-тәрбие беру жұмысын жетілдіру және жүйелеу екенін айтты. Аталған жұмыс барлық білім беру мекемелерін қамтуға тиіс.
Мемлекеттік кеңесші тәрбие үдерісінде кешенді тәсіл қолдану, яғни, мемлекет, мектеп және ата-ана арасындағы тығыз ықпалдастықты жолға қою қажет екенін ескертті.
Жиын соңында тәрбие бағдарламасын мектептер мен колледждерге енгізу жұмысын жалғастыру туралы тапсырма берілді.
