Ермек Маржықпаев жол апатынан көз жұмған жүргізушінің отбасымен кездесті
«Әлеуметтік желідегі менің аккаунтымда «Көкшетау-Щучье» тас жолында жол-көлік оқиғасы орын алғаны туралы пікір қалдырылған болатын. Жол оқиғасы салдарынан 1992 жылғы жерлесіміз қаза тапты. Мерт болған жерлесіміздің отбасымен кездесіп, көңіл айттым. Сондай-ақ, кездесуге Ақмола облыстық полиция департаментінің қызметкерлері қатысты. Полиция департаментіне істі жеке бақылауға алуды тапсырдым», - деп жазды аймақ басшысы.
Айта кетейік, Ақмола облыстық ПД мәліметі бойынша, жол-көлік оқиғасы өткен жылы желтоқсанның 20-да «Нұр-Сұлтан-Көкшетау» тас жолының 282 шақырымында DAF, Mitsubishi және Nissan qashai көліктері соқтығысқан болатын. Жол апатынан Митсубиси көлігінің жүргізушісі Ақмола облыстық көпбейінді аурханасында көз жұмды. Осыған байланысты ҚР ҚК 345 бабының 3 бабы бойынша сотқа дейінгі тергеу амалдары қолға алынған еді.