Ертегі гүліндей: Қазақстанда сирек кездесетін бұйра лалагүл бар
АСТАНА. KAZINFORM — Қазақстанның Қызыл кітабына енген бұйра лалагүл табиғатта сирек кездеседі. Ерекше пішінімен көз тартатын бұл гүл таулы аймақтардың орманды және шалғынды бөліктерінде өседі.
Экология және табиғи ресурстар министрлігі баспасөз қызметінің мәліметінше, бір қарағанда бұйра лалагүл ертегі гүліндей көрінеді.
— Күлтелері кейін қарай қайырылып, ерекше пішін түзетін бұйра лалагүл — Қазақстанның Қызыл кітабына енген сирек өсімдіктердің бірі. Бұл гүл табиғатта көзге жиі түсе бермейді. Ол таулы аймақтардың орманды және шалғынды бөліктерінде өсіп, жаз мезгілінде ерекше реңімен көз тартады, — дейді мамандар.
Бұйра лалагүлдің әсемдігі — тек сыртқы көрінісінде емес. Табиғи популяциясының сақталуы оның мекен ету ортасын қорғаумен тікелей байланысты. Сондықтан сирек гүлді көргенде ең дұрыс әрекет — үзбей, тамашалап қана өту.
Министрлік атап өткендей, Қызыл кітаптың әр парағы бізге бір қарапайым қағиданы еске салады: табиғаттағы ең әдемі дүниелер өз орнында қалғанда ғана құнды.
Бұдан бұрын Қазақстанда өсетін, сирек кездесетін қызғалдақтар туралы жазғанбыз.
