«Ешқандай қобалжу жоқ»: Мектеп оқушылары мен ата-аналар Pfizer вакцинасы жайлы
НҰР-СҰЛТАН. ҚазАқпарат - Елорда мектептерінде оқушыларды коронавирусқа қарсы Pfizer препаратымен вакциналау жүріп жатыр, деп хабарлайды ҚазАқпарат қала әкімдігінің ресми сайтына сілтеме жасап.
«Бүгін коронавирусқа қарсы Pfizer вакцинасын аламын. Аздап қобалжығаным рас. Бірақ екпенің көмегімен пандемия жағдайына қарамай көшеде емін-еркін жүре алатынымды білемін. Екпе алмаған балаларға қарағанда көбірек мүмкіндікке ие боламын және ауырып қалудан қорықпаймын», - деді мектеп оқушысы Ольга Бутакова.
Оқушының анасы Юлия Бутакова КВИ-ге қарсы екпені кезексіз алу мүмкіндігі берілгеніне қуанышын жасырмады.
«Бүгін Pfizer вакцинасын аламын. Бұл өз денсаулығымды болашақта қауіпсіз етеді деп санаймын», - деп өз ойымен бөлісті оқушы Динара Амангелді.
Өз кезегінде ата-аналар балаларға вакцина салу процесін бақылауға мүмкіндік берілгеніне алғыс айтты.
«Балам Pfizer екпесін алады. Вакцинация мектеп қабырғасында өтіп, оған ата-аналардың қатысуына мүкіндік бергеніне ризамын. Pfizer вакцинасына сенемін, сондықтан қорықпаймын», - деді Әсемгүл Әбдіхалықова.
Сынып жетекшісі Зейнеп Істемесованың айтуынша, өз оқушыларының екпе алуы өзге балаларға қорқынышты жеңуге үлгі болады.
«Сыныбымдағы оқушылар бүгін вакцинациядан өтіп жатыр. Бұл - баланың денсаулығы үшін маңызды деп есептеймін. Екпе алғандар COVID-19 вирусын жұқтырғанның өзінде ауруды жеңіл өткізеді. Оқушыларымның екпе алуы өзгелерге үлгі болады», - деді ол.
Айта кетейік, елордада жүкті, бала емізетін әйелдерді және балаларды Pfizer препаратымен вакциналау 15 қарашада басталды.
