Есіңе мені алғайсың: Елордада Мұқағали Мақатаевты еске алуға арналған кеш өтті
НҰР-СҰЛТАН. ҚазАқпарат - Елордада Нұр-Сұлтан қаласы әкімдігінің Еркеғали Рахмадиев атындағы мемлекеттік академиялық филармониясында ақиық ақын Мұқағали Мақатаевты еске алуға арналған «Есіңе мені алғайсың» атты музыкалық-поэзиялық кеш өтті.
Кеш филармонияның классикалық және эстрадалық вокал бөлімі ұйымдастырыуымен көрерменге ұсынылды.
Бөлімнің көркемдік жетекшісі - ҚР еңбек сіңірген қайраткері Арайлым Рахымқызы.
Ақынның мәңгілік асыл мұраға айналған әсем әндері жанды дауыста орындалып, жалынды жырлары жатқа оқылған концертте халық жүрегінен терең орын алған шығармалар ұсынылды.
«Бүгінгі кештегі біздің мақсатымыз - келешек ұрпақ бойына Мұқағали өлеңдеріндегі адамгершілік, ізгілік қасиеттерді сіңіру арқылы ұлттық тәрбие беру, ақиық ақынның рухани мұраларын тағы бір мәрте жаңғырту және музыкамен поэзияны ұштастыра отырып көрерменге керемет кеш ұсыну», - дейді Арайлым Рахымқызы.
«Есіңе мені алғайсың» музыкалық-поэзиялық кешінде елімізге белгілі филармония әншілері, Қазақстанның еңбек сіңірген артисі Майра Ильясова, ҚР еңбек сіңірген қайраткерлері: Медет Салықов, Клара Төленбаева, Азамат Жылтыркөзов, Қанат және Света Айтбаевтар, Гүлнұр Оразымбетова, Алтынай Жорабаева, Арайлым Рахымқызы, Сүндет Байғожин, Елена Әбдіхалықова, халықаралық байқаулардың лауреаттары Зарина Омарова, Ақбота Құснадин, Әкімхан Маженов, Мұратбек Хайролда, Диана Май, Салтанат Серкебаева, Нұрбол Балапанов, Парасат Отан, Талғат Аллабиринов, Әйгерім Ораз, Айдын Жұмабай,Сәулежан Тағзия, Әсет Әлжанов, «Айналайын» балалар хоры мен «Alem» эстрадалық би ансамблінің және ҚР еңбек сіңірген қайраткері, танымал актер Жанқалдыбек Төленбаев (Мұқағали образында) өнер көрсетті.
