«Есірткіге тосқауыл» жедел алдын алу іс-шарасы барысында айналымнан 2 келі 737 грамм есірткі заттары алынды
АСТАНА. Қыркүйектің 14-і. ҚазАқпарат /Марлан Жиембай/ - Қыркүйектің 13-і күні Көліктегі орталық ішкі істер дептартаментінің қызметкерлері «Есірткіге тосқауыл» жедел сауықтыру іс-шарасының 3-ші кезеңін аяқтады.
Бұл жайлы бүгін журналистермен арнайы баспасөз мәслихатын өткізген КОІІД Есірткі бизнесімен күрес басқармасы бастығының міндетін атқарушы полиция капитаны Олжас Жарылғапов баяндады, деп хабарлайды ҚазАқпарат.
Оның айтуына қарағанда, іс-шара қыркүйектің 7-13-і аралығында аталған департаментке қарасты учаскелерде жүргізілген. Шара барысында тәртіп сақшылары 28 қылмыстық іс қозғаса, оның 2-уі есірткі заттарын сатуға, 1-уі контрабандаға қатысты болған. Айналымнан 2 келі 737 грамм әртүрлі есірткі заттары алынды, оның 118 грамы - героин.
«Осы шара барысында Оңтүстік аймақтардан келетін 60 жолаушы пойызына тексеру жүргіздік. Оның барысында 1 есірткі қылмысы мен әкімшілік құқық бұзушылық анықталды. Сонымен қатар, 40 автокөлік құралы тексерілді», дейді полиция капитаны О.Жарылғапов.
