Этномәдени бірлестіктер мемлекеттік тілді оқыту мен оны жұртшылыққа танымал ету ісінде жаңа бастамалар көтеріп, белсенділік танытуда - Шерубай Құрманбайұлы
АЛМАТЫ. 25 қараша. ҚазАқпарат /Нәзира Елеухан/ - Қазіргі таңда этномәдени бірлестіктер мемлекеттік тілді оқыту мен оны жұртшылыққа танымал ету ісінде жаңа бастамалар көтеріп, белсенділік танытуда. Бұл туралы бүгін Алматыда «Тіл - халық жанын танудың кілті» атты орыс жастары арасындағы қазақ тілі білгірлерінің V республикалық байқауында ҚР Мәдениет министрлігі Тіл комитетінің төрағасы Шерубай Құрманбайұлы айтты.
«Оның бір дәлеліне Қазақстанның Орыс қауымы мұрындық болуымен өткізіліп келе жатқан орыс жастары арасындағы қазақ тілі білгірлерінің республикалық байқауы бола алады»,-деді ол.
Ол сонымен қатар: «Бүгінгі таңда біздің жас ұрпағымыз мемлекеттік тілді қалың бұқараға танымал ету және үгіттеу жолында белсенді атсалысуда. Бұған «Тіл - халық жанын танудың кілті» атты орыс тілді жастар арасындағы қазақ тілі білгірлерінің республикалық байқауы да септігін тигізуде. Әр жылдардағы байқау жеңімпаздары өздерін үлгі етіп, жастарға арналған түрлі іс-шаралар мінберінен мемлекеттік тілді жетік білуші адамдардың беделі әрқашанда биік болатынын жұртшылыққа паш етіп жүр»,-деді.
Шара барысында Ш. Құрманбайұлы: «Жастарымыздың қазақ тілін және басқа да тілдерді меңгеруі - бұл жастардың, өздерінің биік жетістіктерге қол жеткізуінің міндетті шарты екенін түсінетіні қуантарлық жайт»,-деп атап өтті.
