Еуроодақ АҚШ тауарларына салық салмақ

АСТАНА. KAZINFORM – Еуроодақ билігі АҚШ-тан келетін 72 млрд еуроның тауарына баж салығын дайындап қойды. Бұл АҚШ президенті Дональд Трамптың қоқан-лоқысына жауап болмақ.

Бұл туралы дүйсенбі, 14 маусым күні сауда жөніндегі еурокомиссар Марош Шефчович мәлім етті.

DW-нің хабарлауынша, Еуроодақ билігі Американың құны 72 млрд еуро болатын тауарларының тізімін дайындап қойды. Оларға баж салығы салынатын болады. Бұл АҚШ-тың салық саясатына жауап болмақ.

- Бүгін Еурокомиссия ұйымға мүше елдерге АҚШ-тан импортталатын құны 72 млрд еуро болатын тауарлардың тізімі бойынша ұсыныс жасайды. Енді олар осы тізімді талқылай алады,-деп келтірді шенеуніктің сөзін ЕК сайты.

-Бұл біздің соңғы құралымыз емес,-деді М. Шефович.

Ол қандай тауарлар туралы әңгіме болып жатқанын нақтыламады.

Соған қарамастан Брюссель әлі де болса Вашингтонмен келіссөздер жүргізуге дайын.

- Біздің трансатлантикалық қарым-қатынастарымыз келіссөздер арқылы шешілуге лайықты, -деді еурокомиссар.

12 шілде күні Дональд Трамп Еуроодақтан келетін тауарларға 1 тамыздан бастап, 30% кедендік алым салуды жоспарлап отырғанын мәлімдеді. Ол бұны Брюссель мен Вашингтон арасында ең үлкен сауда дефицитімен байланыстырып отыр.

Ақ үй басшысы егер еуропалық компаниялар өнімді АҚШ-та шығаратын болса, олар сауда салығынан босатылатынын айтты.

Сонда-ақ Трамп егер Еуроодақ америкалық тауарларға салық салатын болса, оған жауап та тура сондай болатынын жеткізді.

Осыған дейін Трамп тарифтерінің салдарынан айфондар мен Еуроодақ тауарлары қымбаттауы мүмкін екені туралы жаздық.