Еуроодақ азаматтары үшін Ұлыбританияға кіру ақылы болады

АСТАНА. KAZINFPORM — Жаңа ережелер 2025 жылдың 2 сәуірінен бастап күшіне енді. Ережеге сәйкес, енді Еуроодақ азаматтары Ұлыбританияға кіру үшін электронды рұқсат алып, тиісті төлем жасауы керек, деп хабарлайды Euronews. 

Не өзгерді?

Бұрын Еуроодақтан келген саяхатшылар оңайлатылған кіру процедурасын пайдаланды: ұшаққа мініп, келген кезде қарапайым төлқұжаттық бақылаудан өту жеткілікті болды. Қазіргі уақытта олар саяхаттау үшін алдын ала электронды рұқсатты қажет ететін әлемнің 48 елінің азаматтарының қатарына қосылды.

ETA дегеніміз не?

ETA (Electronic Travel Authorization) — елге кіруге алдын ала рұқсат беретін «электрондық саяхатқа рұқсат». Бұл — америкалық ESTA жүйесіне Ұлыбританияның балама нұсқасы, саяхатшының тегін алдын ала тексеруді қамтитын міндетті ақылы рұқсат.

Жүйені енгізу тарихы

ETA жүйесі Ұлыбританияда кезең-кезеңімен енгізілді. Бастапқыда 2024 жылы Парсы шығанағындағы араб мемлекеттері ынтымақтастық кеңесі елдерінің азаматтарына қатысты қолданылды. 

Кейінірек бұл басқа еуропалық емес саяхатшылар, соның ішінде АҚШ, Канада және Аустралия азаматтары үшін міндетті болды.

2025 жылдың 8 қаңтарынан бастап бұл талап 48 елдің азаматтары үшін міндетті болды. 2 сәуірден бастап бұл жүйе Еуроодақ азаматтарына да енгізілді.

Ұлыбританияда заңды түрде тұратын аталмыш елдердің азаматтары ETA алудың қажеті жоқ.

Бұл жүйе негізінен Ұлыбританияға алты айға дейінгі қысқа мерзімді сапарларға арналған. Рұқсатты келесі мақсаттар үшін алуға болады: 

туризм;

іссапарлар;

қысқа мерзімді білім беру;

ақылы жұмыстың кейбір түрлері.

Жүйені іске қосу кезінде ETA бағасы £10 (шамамен $12,50) болды. Бірақ 2025 жылдың 9 сәуірінен бастап төлемақы £16 (шамамен $20) дейін көтеріледі. 

Өтінішті екі жолмен — Ұлыбритания үкіметінің ресми сайтында берілген арнайы өтінім арқылы немесе ресми сайтта тікелей онлайн түрде беруге болады. Бұл өзгерістер дамыған бірнеше елде шекаралық бақылауды күшейту және кіру процедураларын цифрландыру бойынша жаһандық үрдісті көрсетеді. 

Еске сала кетейік, Орталық Азия мен ЕуроОдақты қандай мүдде біріктіретінін жазған едік.