Еуропада А тұмауымен тәулік ішінде 1 мың 600-ден астам адам ауырды
АСТАНА. Шілденің 25-і. ҚазАқпарат - A(H1N1) вирусы Еуропада жоғары қарқынмен өршуде - тәулік ішінде 1 мың 600-ден астам жұқтыру жағдайы тіркелді,
деп хабарлайды ҚазАқпарат РБК сайтына сілтеме жасап.
Германияда соңғы тәулікте A(H1N1) вирусын жұқтырғандардың саны бірден 600 адамға өсті. Роберт Кох институтының ақпараты бойынша бүгінгі күні ГФР-да тұмаудың қауіпті түріне шалдыққан 2 мың 500 жағдай тіркелді. Жаңа вирус негізінен демалыстарын Испанияда өткізген елдердің тұрғындарынан табылған, деп хабарлайды Deutsche Welle.
Қауіпті вирусты жұқтырғандардың саны ең көп ел бұрынғыша Ұлыбритания болып отыр. Шілденің 24-інде Еуроодақтың эпидемиологиялық қызметі онда 11 мың 100-ден астам жағдайды тіркеді, 30 адам ауру салдарынан көз жұмды.
Бүгінгі күні әлемде барлығы A(H1N1) вирусын жұқтырған 132 мың оқиға тіркелген.
