Еуропарламент Сербиядағы қанды оқиға құрбандарын бір минут үнсіздікпен еске алды

СТРАСБУРГ. ҚазАқпарат - Дүйсенбі күні Францияның Страсбург қаласында Еуропарламенттің кезекті көшпелі сессиясы басталды. Сербияда адам өлтірудің екі қайғылы оқиғасына байланысты Еуропарламент депутаттары қаза тапқандарды бір минут үнсіздікпен еске алды, деп хабарлайды ҚазАқпарат тілшісі.

Өткен аптада Сербияда екі қайғылы оқиға болды. 3 мамырда Белградтың орталық аудандарының бірінде 13 жастағы жасөспірім өз мектебінде 8 оқушы мен күзетшіні атып өлтірді. Жұма күні кешке қарай 21 жастағы ер адам Белградтан 40 шақырым жердегі Дубона кентінде автоматтан оқ жаудырған. Салдарынан 8 тұрғын көз жұмып, 14 адам жарақат алды.
Еуропарламент президенті Роберта Метсола Сербиядағы осы оқиғалардың құрбандарын бір минут үнсіздікпен еске алуға шақырды.
«Бұл шабуылдарға кінәлілер жауапқа тартылуы тиіс», - деді Еуропарламент басшысы. Сондай-ақ ол қайғылы оқиғада қаза болғандардың отбасылары мен жақындарына көңіл айтты.